Imeandikwa na Alex Maina
Kwa miaka mingi, wakaazi wa Mwanzo walikumbwa na changamoto kubwa za miundombinu. Mvua iliponyesha, barabara zilifurika, njia ya maji ilijaa, na maji yaliingia ndani ya nyumba za watu. Kutembea kuelekea nyumbani kulihitaji ujasiri mkubwa kwani barabara zilikuwa na mafuriko. Watu wengi walilazimika kulala nyumbani kwa marafiki au jamaa hadi maji ya mvua yapungue. Msimu wa mvua uliwaletea wakaazi hao hofu, hasara, na usumbufu mkubwa.
Lakini hali hii sasa imeanza kubadilika kupitia msaada wa Mradi wa Kuboresha Makazi Yasiyo Rasmi nchini Kenya, KISIP.
Kulingana na kile kilichoandikwa kwa tovuti ya KISIP. Mnamo mwaka 2011, Serikali ya Kenya kwa kushirikiana na Benki ya Dunia na washikadau wengine, ilizindua rasmi mradi wa KISIP. Mradi huu unalenga kuboresha hali ya maisha ya wakaazi wa makaazi yasiyo rasmi katika miji kumi na tano hapa nchini kwa kuboresha miundombinu kama barabara na njia ya maji na pia kuwapa wakaazi usalama wa umiliki wa ardhi. KISIP unasimamiwa chini ya Wizara ya Ardhi, Nyumba, na Maendeleo ya Miji.
Mnamo Agosti 2024, eneo la Mwanzo liliingizwa rasmi katika Awamu ya Pili ya KISIP. Hii ilikuwa ni fursa kubwa kwa wakaazi wa Mwanzo kuona mabadiliko ya kweli katika maisha yao. Moja ya mafanikio makubwa ambayo yameonekana ni ujenzi wa njia ya maji ya mvua kupitia iliyowekwa vizuri. Njia hii sasa inaelekeza maji ya mvua moja kwa moja hadi mto wa karibu, kuzuia mafuriko barabarani na kuingia nyumba za watu. Kwa mara ya kwanza kwa miaka mingi, barabara zimeanza kukauka kwa haraka, na wakazi wanaweza kutembea kwa urahisi hata wakati wa mvua kubwa.
Katika mikutano ya ushirikishwaji wa umma, wakaazi wa Mwanzo walitoa shukrani zao kwa maendeleo haya. Walisema kuwa maisha yao yamebadilika kabisa ikilinganishwa na kipindi cha nyuma. Wazazi walieleza furaha yao kwa kuwa watoto wao sasa wanaweza kwenda shule na kurejea hata baada ya mvua kubwa, bila kuogelea kwenye maji ya barabarani. Wafanyabiashara wadogo pia walisema kuwa kutokana na barabara kuwa bora bila kufurika, wateja wameweza kuongezeka hata baada ya mvua na biashara imeanza kufufuka.
Ingawa kazi bado inaendelea, matumaini ya wakaazi yameongezeka sana. Wananchi wanatarajia kwa hamu kazi ya mradi kukamilika kwa wakati ili kuleta mabadiliko ya kudumu katika maisha yao. Mwanzo sasa inajengwa upya kwa msingi wa ushirikiano wa serikali na wananchi, mpangilio mzuri, na uwekezaji sahihi.
Hadithi ya Mwanzo ni ushahidi wa wazi kwamba serikali ikifanya kazi kwa karibu na wananchi, na kuwajali kwa kweli, mabadiliko makubwa yanawezekana. KISIP ni mfano mzuri wa jinsi uwekezaji wa miundombinu na ushirikishwaji wa jamii unavyoweza kubadilisha maisha ya watu katika makaazi yasiyo rasmi.
